ACLEDA VISA Credit Card
Dr. IN Channy, President & Group CEO of ACLEDA Bank Plc.
Ms. Lorijon Bacchi, Visa Country Manager, Vietnam, Cambodia and Laos
Distinguished guests in the official launching of ACLEDA VISA Credit Card
រាជធានីភ្នំពេញ, ថ្ងៃទី០៨ ខែវិច្ឆិកា ឆ្នាំ២០១៣ ៖ ធនាគារ អេស៊ីលីដា ភីអិលស៊ី ជា ប្រជាធនាគារដែលលោកអ្នកជឿទុកចិត្ត និងជាធនាគារពាណិជ្ជនាំមុខគេក្នុងព្រះរាជាណាចក្រកម្ពុជា ប្រកាសជាផ្លូវការ នៅថ្ងៃនេះថា ធនាគារចាប់ផ្តើមបម្រើជូនអតិថិជន និងសាធារណជន នូវផលិតផលថ្មី គឺ "ប័ណ្ណឥណទានវីសាអេស៊ីលីដា" ។ ប័ណ្ណឥណទានវីសាអេស៊ីលីដា ជាប័ណ្ណដែលមានសុវត្ថិភាពខ្ពស់បំផុត ត្រូវបានផលិតស្របតាមបទដ្ឋានទាន់សម័យបំផុត ដែលធានាបាននូវសុវត្ថិភាពខ្ពស់ជូនដល់អតិថិជន ។ ប័ណ្ណឥណទានវីសាអេស៊ីលីដា ត្រូវបានទទួលស្គាល់ជាបទដ្ឋានទិន្នន័យសុវត្ថិភាពនៃឧស្សាហកម្មប័ណ្ណទូទាត់ (PCI DSS) ។ ប័ណ្ណឥណទានវីសាអេស៊ីលីដា មានលក្ខណៈប្រកបដោយសុវត្ថិភាព និងមានភាពងាយស្រួល ក្នុងការធ្វើប្រតិបត្តិការទូទាំងសកល ។ ប័ណ្ណឥណទានវីសាអេស៊ីលីដា អាចធ្វើប្រតិបត្តិការធនាគារបាន តាមកម្រិតបន្ទាត់ឥណទានដែលមានស្រាប់ ឬបានអនុម័តដោយធនាគារ អេស៊ីលីដា ភីអិលស៊ី ។
ប័ណ្ណឥណទានវីសាអេស៊ីលីដា ជាជម្រើសដ៏ប្រសើរមួយ និងផ្តល់ភាពងាយស្រួលសម្រាប់ការឆ្ពោះទៅរកជីវភាពរស់នៅក្នុងភាព ទំនើបទាន់សម័យ ក្នុងការទូទាត់ដោយចាប់តាំងពីការបញ្ជាទិញទំនិញ-សេវាកម្មប្រចាំ ថ្ងៃ រហូតឈានទៅដល់ការទូទាត់តាមរយៈប្រព័ន្ធអ៊ីនធឺណែត ។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ "យើងតែងតែយកចិត្តទុកដាក់ស្តាប់ដំបូន្មានដ៏ល្អៗ និងដំបូន្មានដ៏មានតម្លៃរបស់អតិថិជន, ធនាគារ អេស៊ីលីដា ភីអិលស៊ី តែងតែបង្កើតនូវផលិតផល និងសេវាកម្មហិរញ្ញវត្ថុថ្មីៗ ដើម្បីបំពេញតម្រូវការជូនអតិថិជន" ។
លោកបណ្ឌិត អ៊ិន ចាន់នី បានបន្តទៀតថា "ថ្ងៃនេះ តបតាមដំបូន្មានដ៏មានតម្លៃរបស់អតិថិជន ធនាគារ អេស៊ីលីដា ភីអិលស៊ី ដាក់ឱ្យប្រើប្រាស់ជាផ្លូវការនូវឧបករណ៍ទូទាត់ហិរញ្ញវត្ថុ ដ៏សំខាន់លំដាប់សកលលោក គឺ ប័ណ្ណឥណទានវីសាអេស៊ីលីដា ដែលជាប័ណ្ណជួយឱ្យម្ចាស់ប័ណ្ណអាចបញ្ជាទិញទំនិញ-សេវាកម្មនានា បាននាពេលឥឡូវនេះ ហើយនិងធ្វើការទូទាត់សងវិញនៅពេលក្រោយ ។ ប័ណ្ណឥណទានវីសាអេស៊ីលីដា គឺជាជម្រើសមួយដ៏អស្ចារ្យ សម្រាប់ការបង្កើនសុវត្ថិភាពប្រតិបត្តិការហិរញ្ញវត្ថុជាសកល និងផ្តល់ភាពងាយស្រួលជូនដល់អតិថិជន ។ ការប្រើប្រាស់ ប័ណ្ណឥណទានវីសាអេស៊ីលីដា អតិថិជនអាចធ្វើប្រតិបត្តិការ បានកាន់តែងាយស្រួលដោយមិនចាំបាច់កាន់សាច់ប្រាក់សុទ្ធ នៅពេលដែលពួកគាត់ធ្វើដំណើរទេសចរណ៍ទាំងនៅក្នុងប្រទេស និងសកលលោក ។ ប័ណ្ណឥណទានវីសាអេស៊ីលីដា អាចជួយសម្រួលដល់អតិថិជន ធ្វើប្រតិបត្តិការបានកាន់តែងាយស្រួល និងមានសុវត្ថិភាព តាមរយៈម៉ាស៊ីនអេធីអឹម (ATM), ម៉ាស៊ីនឆូតកាត (POS), ឬប្រព័ន្ធអ៊ីនធឺណែត (e-commerce) ។ អតិថិជនអាចដកសាច់ប្រាក់បានដោយឆាប់រហ័យ និងធ្វើការទូទាត់ថ្លៃទំនិញ-សេវាកម្មផ្សេងៗ បានគ្រប់ពេលវេលា គ្រប់ទីកន្លែងដែលមានស្លាកសញ្ញាវីសា VISA ឬ VISA Plus នៅក្នុងព្រះរាជាណាចក្រកម្ពុជា និងជុំវិញសកលលោក ។ ជាពិសេសអតិថិជនអាចធ្វើការបញ្ជាទិញទំនិញ កក់សំបុត្រយន្តហោះ ឬកក់បន្ទប់សណ្ឋាគារ ។ល។ នៅនឹងកន្លែង ឬតាមរយៈប្រព័ន្ធអ៊ីនធឺណែត" ។
លោកបណ្ឌិត បានបន្ថែមទៀតថា "តាមរយៈការដាក់ឱ្យប្រើប្រាស់ជាផ្លូវការនូវ ប័ណ្ណឥណទានវីសាអេស៊ីលីដា នាពេលនេះ គឺជាសក្ខីភាពដែលបង្ហាញឱ្យឃើញថាធនាគារ អេស៊ីលីដា ភីអិលស៊ី បានប្តេជ្ញាបន្តពង្រីកតួនាទីឈានមុខគេ ក្នុងការផ្តល់ផលិតផល និងសេវាកម្មហិរញ្ញវត្ថុចម្រុះដ៏សម្បូរបែប ជូនដល់សាធារណជនគ្រប់មជ្ឈដ្ឋានក្នុងសហគមន៍" ។
លោកស្រី Lorijon Bacchi នាយិកាគ្រប់គ្រងវីសាប្រចាំប្រទេសវៀតណាម កម្ពុជា និងឡាវ បានមានប្រសាសន៍ថា ៖ យើងមានក្តីសប្បាយរីករាយណាស់ ដែលបានឃើញការដាក់ឱ្យប្រើប្រាស់ជាផ្លូវការនូវ ប័ណ្ណឥណទានវីសាអេស៊ីលីដា របស់ធនាគារអេស៊ីលីដានាថ្ងៃនេះ ។ ប័ណ្ណឥណទានវីសា ជាប័ណ្ណមួយអាចជួយលោកអ្នកទិញទំនិញ ឬសេវាកម្មផ្សេងៗបានភ្លាមៗ និងទូទាត់វិញនៅពេលក្រោយ ។ ប័ណ្ណឥណទានវីសារបស់លោកអ្នក អាចប្រើប្រាស់បានជាមួយម៉ាស៊ីនឆូតកាត ចំនួន ១០លានគ្រឿង នៅតាមបណ្តាហាងលក់ទំនិញ-សេវាកម្ម នៅជុំវិញសកលលោក ហើយប័ណ្ណឥណទានវីសានេះ ធានាបាននូវសុវតិ្ថភាពល្អប្រសើរជាងការកាន់សាច់ប្រាក់សុទ្ធ គឺមានន័យថាប័ណ្ណឥណទានវីសា ដែលបានបាត់ហើយ គឺយើងអាចជំនួសថ្មីវិញបាន ប៉ុន្តែបើសាច់ប្រាក់បានបាត់ ឬត្រូវបានគេលួចយកនោះ គឺបាត់បង់រហូត" ។
លោកស្រីបានបន្ថែមទៀតថា "ជាមួយគ្នានេះ ស្ថាប័នវីសា បានប្តេជ្ញាចិត្តធ្វើប្រតិបត្តិការជាមួយធនាគារអេស៊ីលីដា ដើម្បីជួយអតិថិជន ក៏ដូចជាប្រជាជនកម្ពុជា ដែលកំពុងប្រើប្រាស់ប័ណ្ណឥណទាន បានជ្រាបកាន់តែច្បាស់ពីដំណើរការរបស់ប័ណ្ណឥណទាន ដូច្នេះពួកគាត់អាចផ្តល់ការសម្រេចចិត្តក្នុងការគ្រប់គ្រងសាច់ប្រាក់ របស់ពួកគាត់ឱ្យកាន់តែប្រសើរបំផុត ។ នៅពេលប្រើប្រាស់ដោយមានការទទួលខុសត្រូវ ប័ណ្ណឥណទាន អាចផ្តល់អត្ថប្រយោជន៍ដ៏មានសារៈសំខាន់ និងជាឧបករណ៍ទូទាត់ដ៏មានសុវត្ថិភាពបំផុត" ។
ធនាគារអេស៊ីលីដា មានបណ្តាញការិយាល័យប្រតិបត្តិការចំនួន ២៣៨ ទូទាំងព្រះរាជាណាចក្រកម្ពុជា, ៣៥ ការិយាល័យ នៅប្រទេសឡាវ និង ០៣ ការិយាល័យ នៅប្រទេសមីយ៉ាន់ម៉ា ជាមួយនឹងទ្រព្យសកម្មសរុបចំនួនជាង ២,២ ពាន់លានដុល្លារអាមេរិក នៅដំណាច់ខែតុលា ឆ្នាំ២០១៣ ។ ធនាគារអេស៊ីលីដា មានក្រុមហ៊ុនបុត្រសម្ព័ន្ធចំនួនបួន គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និង អេស៊ីលីដា មីក្រូហិរញ្ញវត្ថុ មីយ៉ាន់ម៉ា ហើយតាមយុទ្ធសាស្រ្ត ធនាគារអេស៊ីលីដា នឹងបន្តពង្រីកវិសាលភាពប្រតិបត្តិការទៅក្នុងតំបន់អាស៊ាន និងបណ្តាប្រទេសនៅតាមដងទន្លេមេគង្គដទៃទៀត ។
0 comments:
Post a Comment